LVK winnaars 2020 Spik & Span: Jus noe

Jus noe

Weer höbbe os de lèste waeke aafgevraog: höbbe weer dit jaor het geveul van vastelaovend, het geveul van het LVK? En es weer ieërlik zeen: det is lestig. En det is neet ómdet det vastelaovesgeveul zelf minder is, mer det is ómdet weer de rituele die weer same opgeboewd höbbe in de jaore, noe neet kènne doon. En det veult vraemd.

Alles geit noe anges.…In plaats van sjoenkele erm in erm, zoome weer vanoet de woonkamer mit eine vastelaovesquiz; in plaats van boewe aan eine wage in de hal, gaon weer thoes vastelaovesfilmkes van vreuger kieke; in plaats van het LVK belaeve in ein hal mit 7000 man in ós eige gemeinte Ech-Zöstere, noe ein halve finale veur de radio. 

Mer biej ós zeije ze vreuger al: Es het neet geit wie het mót , den mót het mer wie het geit. Daorom is het sjiek det de Stichting LVK in mei al gerope haet: “Het LVK geit door, in welke vorm den ouch”. En det L1 en de Stichting same zeen opgetrokke óm het LVK te laote doorgaon. 

De vorm van dit LVK, ederein wou det het anges woor. Mer ich dènk det weer bliej kènne zeen det het plaatsvundj. Want vastelaoves-oetzendinge det is net zoa belangriek, of mesjien waal belangrieker, den talkshows of Eredivisievoetbal. Want dit evenement raak precies detgene wat Limburg zoa anges maak es die anger provincies: ós taal, ózze verbónjeheid en het geveul van vastelaovend. En det geveul is neet weg, het kump dit jaor anges tot ós. Jus noe höbbe weer det geveul nuëdig!

Weer wunsje uch ein sjaon finale, anges es anges, mer waal vol vastelaovesgeveul.

Jo en Niek

Deel deze pagina: